自从二十来年前，世界斯诺克舞台上突然出现了一个中国神童丁俊晖，忒个向来由英国人把持个绅士运动，一下子就勒拉中国热门起来。由于忒项运动，动静相宜，技巧与智慧完美结合，勿管是犀利个进攻还是巧妙个防守，侪极有观赏性，所以勿仅年轻人喜欢，不少中老年人也离开麻将台，到斯诺克球台边跃跃欲试。

尤其还出现了一种称之为“丁俊晖模式”个培养方式，有点钞票个家长，纷纷效仿，将一个个刚刚比球台高出半只头个小朋友拉到球台边浪，毕竟也是一条谋生，甚至出名发迹个渠道，侬勿要看勿起，十几年里照样出了勿少好苗子，现在连英格兰斯诺克高手只要碰到中国90、00后们，总是有点抖豁。

最近更有后生赵心童一举拿下了世锦赛冠军，50万英镑到手，为中国斯诺克热又平添一把火。加之刚刚结束上海大师赛，马勿停蹄十几个中国小青年又冲向总奖金高达230万英镑个沙特大师赛，一时浪厢，穷得已差点揭勿开锅个地方体育台，天南地北个自媒体，纷纷砸铜钿抢直播，真是热浪滚滚。

斯诺克（Snock），直译个意思是台球，其实忒项运动一百年前就传到上海了，不过范围极小，普通百姓少有接触。当时上海人那能称呼伊呢？叫伊台球，容易跟乒乓球混淆，因为上海人老底子打乒乓就叫打台球，为之就照样“洋泾浜”一下，称其为斯诺克！呒没想到，忒句洋泾浜竟然就此成了标准国语。

我兜兜转转一想，上海洋泾浜闲话里，由“斯”带头或者带“斯”个叫法，还真是勿勿少少。当然“S”写下来可以是“斯”或者“司”，反正洋泾浜就是斯！比如，斯达脱（日光灯里个跳泡），斯必（门锁），斯迪克（手杖），斯门汀（水泥），斯麦脱（时髦），斯毛儿（一眼眼），斯道普（停止），辣司克（最后），派斯（证件）、打牌时派斯又是通过个意思。

好了，一时还想不起更多，欢迎老上海们多多补充了！（临沂二村 顾顺麟）